АЛМАТЫ қ. QAZPATENT филиалында "ҚАЗАҚСТАН РЕСПУБЛИКАСЫНДА ДАРАЛАУ ҚҰРАЛДАРЫН ҚҰҚЫҚТЫҚ ҚОРҒАУ" тақырыбында СЕМИНАР өтті

2025 жылғы 23-25 шілде аралығында Алматыда Qazpatent филиалының Оқу орталығы ұйымдастырған "Қазақстан Республикасында даралау құралдарын құқықтық қорғау" тақырыбында үш күндік оқыту семинары өтті. Семинарға зияткерлік меншік саласындағы мамандар, бизнес, заң компаниялары, ғылыми және білім беру ұйымдарының өкілдері қатысты. Іс-шара бағдарламасы тауар белгілерін, өнеркәсіптік үлгілерді, географиялық нұсқамаларды және тауарлар шығарылған жерлердің атауларын құқықтық реттеуді жан-жақты зерттеуге бағытталған.

Қатысушыларға Qazpatent филиалының директоры Орынбекова Зaуре алғы сөз сөйлеп, нарықтық бәсекелестіктің қазіргі жағдайындағы даралау құралдарының шешуші рөлін және оларды тиісті құқықтық қорғаудың маңыздылығын атап өтті.

Семинар аясында келесі тақырыптар қамтылды:

• тауар белгілерін ұлттық және халықаралық тіркеу;
• өтінімдерге сараптама жүргізу, тіркеуден бас тартулар бойынша тәжірибе және мемлекеттік тізілімдерді жүргізу;
• географиялық нұсқаулар мен ТШЖА құқықтарын қорғау ерекшеліктері;
• еуразиялық жүйені қоса алғанда, өнеркәсіптік үлгілерге өтінім беру және патенттеу тәртібі;
• тауар белгілерін жосықсыз пайдалану, контрафакт және сот практикасы;
• зияткерлік меншік объектілеріне құқықтарды кедендік қорғау және құқықтарды теріс пайдалану мәселелері.

Ерекше назар практикалық аспектілерге, оның ішінде кейстерді талдауды, Qazpatent және Madrid Monitor дерекқорларында іздеуді, өтінімдерді дайындауды, сондай-ақ тіркелу кезіндегі қателерге аударылды.

Спикерлер мен шақырылған сарапшылар арасында:

• Модангуль Тагбергенова - Қазақстанның патенттік сенім білдірілген өкілдері палатасының төрағасы;
• Жанат Нурмагамбетов - "Bolotov & Partners LLP"фирмасының серіктесі;
• Алмас Бекботаев - Алматы қаласы Әділет департаментінің баспасөз хатшысы, зияткерлік меншік құқықтары бөлімінің бас маманы;
• сонымен қатар Qazpatent филиалының сарапшылары мен басшылары.

Іс-шара қорытындысы бойынша қатысушылар құнды практикалық ұсынымдар мен өзекті сұрақтарға жауаптар алды және оларға сертификаттар табысталды.

Qazpatent филиалы барлық спикерлер мен қатысушыларға белсенді қатысқаны және тақырыпқа жоғары қызығушылық танытқаны үшін алғыс білдіреді. Мұндай іс-шараларды өткізу зияткерлік меншік саласындағы мамандардың құқықтық мәдениеті мен кәсіби деңгейін нығайтуға ықпал етеді.