Ұлттық зияткерлік меншік институты
Qazpatent алаңында Дүниежүзілік зияткерлік меншік ұйымының (ДЗМҰ) қолдауымен жүзеге асырылған Зияткерлік меншік бойынша IV Жазғы мектеп өз мәресіне жетті. Екі аптаға созылған бағдарламаға Қазақстанның түрлі өңірлерінен келген жас мамандар, ғылыми қызметкерлер мен бизнес өкілдері, сондай-ақ шетелдік қатысушылар бірікті.
Алғаш рет шара гибридті форматта өтіп, Женева, Мәскеу, Седжон, Астана, Алматы, Шымкент, Орал, Өскемен және Тараз қалаларынан тыңдармандар мен лекторларды тартуға мүмкіндік беріп, географияны кеңейтіп, халықаралық ынтымақтастықты нығайтты.
Қанық оқу бағдарламасы аясында қатысушылар ДЗМҰ, Еуразиялық патент ведомствосы, Qazpatent, патенттік сенім білдірілген тұлғалар, бизнес саласы, жетекші практиктер мен оқытушылар өкілдерінен білім алу мүмкіндігіне ие болды. Әсіресе, дәрістер, мастер-кластар мен топтық пікірталастар қатысушыларға зияткерлік меншік саласындағы өзекті мәселелерді талқылауға зор мүмкіндік берді.
Qazpatent жанындағы Даму және халықаралық ынтымақтастық басқармасының басшысы, Жазғы мектептің ұйымдастырушысы Іңкәр Шертышева былай деді:
«Әр қатысушы мектепке өзінің белсенділігімен және бастамашылдығымен ерекше реңк берді. Лекторлар мен серіктестерге – жобаны жүзеге асыруға қосқан үлесі үшін, ал біздің командаға – жоғары деңгейде ұйымдастырғаны үшін шексіз алғысымды білдіремін».
Қатысушыларға зияткерлік меншік саласындағы құзыреттіліктерін растайтын халықаралық сертификаттар табысталады.
Зияткерлік меншік бойынша IV Жазғы мектеп кәсіби өсім мен интеллектуалдық әлеуетті дамытуға ықпал ететін тиімді білім беру алаңы ретінде өз маңыздылығын тағы да дәлелдеді.
