2025 жылғы 12 наурызда Qazpatent алаңында Қазақстан Республикасының патенттік сенім білдірілген өкілдерімен кездесу өтті. Іс-шара зияткерлік меншік саласындағы өзекті мәселелерді талқылау және ведомство мен патенттік сенім білдірілген өкілдер арасындағы өзара іс-қимылды жетілдіру мақсатында ұйымдастырылды.
Кездесуді Ұлттық зияткерлік меншік институтының директоры Сәбит Ахметов ашты. Құттықтау сөзінде ол зияткерлік меншікті қорғауда маңызды рөл атқаратын патенттік сенім білдірілген өкілдермен ынтымақтастықтың маңыздылығын баса айтты. Сондай-ақ, Qazpatent осы салада заманауи құралдарды белсенді түрде енгізіп, процестерді жетілдіріп жатқанын атап өтті. Директор 2025 жылға арналған ведомство жұмысының басым бағыттарын таныстырып, олардың қатарында цифрландыру, халықаралық ынтымақтастықты дамыту және өтініш берушілерге көрсетілетін қызметтерді жақсарту бар екенін атап өтті.
Кездесу барысында патенттік сенім білдірілген өкілдердің патенттерді, тауар белгілерін және зияткерлік меншік объектілерін тіркеу рәсімдерін жетілдіруге қатысты бірқатар мәселелері мен ұсыныстары қаралды. Талқылаулар ведомство жұмысының техникалық аспектілерін де, жаңартуды қажет ететін құқықтық нормаларды да қамтыды. Атап айтқанда, дауларды сотқа дейін реттеу және зияткерлік меншік құқықтарын қорғауға қатысты сот процестеріне ведомствоның қатысуы мәселелері көтерілді. Ерекше назар цифрлық технологияларды енгізу, деректердің ашықтығы мен қауіпсіздігін арттыру, сондай-ақ өтінім беру және тіркеу рәсімдерін жеделдету шараларына аударылды.
Кездесу соңында Сәбит Ахметов барлық қатысушыларға белсенді қатысқаны және конструктивті ұсыныстары үшін алғысын білдіріп, барлық айтылған идеялар ведомствоның алдағы жұмысында ескерілетінін атап өтті.
«Qazpatent жетістігі негізінен зияткерлік меншік саласындағы мамандардың қатысуына байланысты. Сіздердің ұсыныстарыңыз бен ескертулеріңіз біздің жұмысымызды жетілдіруге көмектеседі, әрі біз әрқашан ашық диалог пен одан әрі дамуға дайынбыз», — деп атап өтті Сәбит Ахметов.
Іс-шара Qazpatent пен патенттік сенім білдірілген өкілдер арасындағы ынтымақтастықты нығайтудағы, сондай-ақ Қазақстанда зияткерлік меншікті қорғау жүйесін одан әрі дамытуға арналған шешімдерді іздеуге бағытталған маңызды қадам болды.
